Монголын ахмад академичдын нэг, Өмнөговь аймгийн Ханбогд сумын уугуул, Шинжлэх ухааны гавъяат зүтгэлтэн, хэл шинжлэлийн ухааны доктор, профессор, Домийн Төмөртогоо гуайн гэр дэх ажлынхаа өрөөнд зочилж ажил, бүтээл, нутаг орнынх нь тухай хуучиллаа. 
Д.Төмөртогоо гуай өдгөө нас 80 шүргэж яваа. МУИС-ийн оюутан байхаасаа буюу 1960 оноос хэл шинжлэлийн ухаанд татагдан эртний бичгийн дурсгалыг сонирхон судалж, тухайн үедээ Нэрт Академич Бямбын Ринчен, Цэндийн Дамдинсүрэн нарын хүмүүсээс Монгол хэлнийхээ түүхэн хувьсал хөгжлийг асууж, мэтгэлзэж үзэл бодлоо ч хэлж явжээ.
МУИС-ийн Монгол судлалын Төвийн эрхлэгч, ШУА-ийн Хэл зохиолын хүрээлэнгийн захирал зэрэг албыг хашихын зэрэгцэээ Энэтхэг, Япон, ХБНГУ-д урилгын профессор, судлаачаар ажиллаж байсан юм.
Бүтээлүүдээс нь дурдвал Монгол хэлний түүхэн хөгжил, эртний бичгийн дурсгалын судалгаа болон үгсийн сангийн холбогдолтой 20 ном, 80 гаруй үгүүлэл бичиж нийтлүүлсэнээс гадна олон улсын эрдэм шинжилгээний 80 гаруй хуралд оролцож илтгэл тавьж байжээ. Хамгийн сүүлд “Монголын нууц товчооны судлал”-ыг бичиж нийтлүүлсэн байна. Одоо ч гэр дэх ажлынхаа өрөөнд компьютерынхаа ард, аягатай цай дэргэдээ тавиад хэл шинжлэлийн судалгаагаа хийж, бүтээлээ туурвисаар сууна.
Өмнөговь аймгийн төв номын сангийн нэгээхэн хэсгийг Академич, говьчуудын бахархал болсон хүмүүний нэг Д.Төмөртогоогийн нэрэмжит болгохоор зорьж буй. Энэ тухайгаа дуулгаж, ярилцлаа.
0 cэтгэгдэлтэй