Шинэ оны дараахан манай тeлeвизээр гарсан Хятадын “Үнэгний ав” олон ангит кино болсон явдлаас сэдэвлэсэн. Эднийд “Хөгжлийн банк” гэж байдаг, тэнд нь бас хулгайч нар үүрлэсэн байж. “Хөгжлийн банк”-наас мөнгө зувчуулаад зугтсан олон арван гэмт хэрэгтнийг Хятадын цагдаа нар гадаадаас барьж авчраад цаазаар аваачихыг нь аваачаад, шоронд хийхийг нь хийгээд, тэдний өч төчнөөн сая долларыг улсынхаа санд хурааж авсан нь мөн л бодит үйл явдал юмсанж.
Гэтэл манайхан “Үнэгний ав” киноноос санаа авч гадаад руу гарч зугтсан луйварчидаа барьж авчрах “Шувуу” хэмээх ажиллагаа хэрэгжүүлэхээр болсон. Харамсалтай нь Хууль зүйн сайд нь “Бид гадаад руу гарч зугтсан зуу гаруй хэрэгтнийг эрж хайн олж авчрахаар “Шувуу” ажиллагаа хэрэгжүүлэхээр боллоо” гээд орон даяар зарлаж, манай бүх тeлeвиз үүнийг нь дэлхий даяар цацчихлаа. Уг нь иймэрхүү юмыг олон нийтэд мэдэгдэлгүйгээр нууц байдалд хэрэгжүүлэх ёстой байсан юм. Жишээ нь Хятадын цагдаа нар “Үнэгний ав” ажиллагаагаа олон нийтэд зарлалгүйгээр нууц байдалд хэрэгжүүлснээр чамгүй амжилтанд хүрсэн гэдэг шүү дээ.
Одоо тэгээд манай нөгөө гадаад руу гарсан луйварчид нь “Биднийг Монголоос шувуунууд ирж барина. Эх орондоо баригдаж очоод хэргээ хүлээгээд тэр шоронд нь сууя даа” гээд л хүлээгээд сууж байх бололтой. Ёстой гонж байлгүй. Тэд аль хэдийнэ хөдөлгөөнд орж газрын гав руу ороод нуугдчихалгүй хаачих билээ. Хамаг нууцаа дэлхийгээр нэг цацаад хаячихдаг ийм усан тэнэг сайд зөвхөн Монгол улсад л байдаг юм байна. Уг нь шувуу гэдэг чинь нам чимээгүйхэн шүүрэх л ёстой. Гэтэл үргээгээд хаячих юм.
Б.ОЙДОВ
LIKE дарж нэгдээрэй !!!
1 сэтгэгдэлтэй